2024-06-21

პერსონალურ მონაცემთა დაცვის სამსახურმა 10 რეგიონის მუნიციპალიტეტების წარმომადგენლებისთვის ტრენინგები ჩაატარა

---

პერსონალურ მონაცემთა დაცვის სამსახურმა, საქართველოს მთავრობის ადმინისტრაციასთან თანამშრომლობით, საქართველოს 10 რეგიონის მუნიციპალიტეტების წარმომადგენლებისთვის, მათ შორის პერსონალურ მონაცემთა დაცვის ოფიცრებისთვის, ტრენინგები ჩაატარა.  შეხვედრები ონლაინ რეჟიმში 5 დღის განმავლობაში მიმდინარეობდა. 

პერსონალურ მონაცემთა დაცვის საბაზისო წესები და ახალი კანონით გათვალისწინებული სიახლეები მუნიციპალიტეტების 250 მდე წარმომადგენელს  სამსახურის საჯარო სექტორზე ზედამხედველობის დეპარტამენტის უფროსმა ქეთევან კრაწაშვილმა, იურიდიული დეპარტამენტის უფროსის მოადგილემ შავლეგ თოდუამ და სამართალდამცავ ორგანოებზე ზედამხედველობის დეპარტამენტის უფროსის მოადგილემ ლიკა ტანიაშვილმა გააცნეს. 

პრეზენტაციები სამსახურის წარმომადგენლებმა მუნიციპალიტეტების მხრიდან წინასწარ მოწოდებილი კითხვებისა და საკითხების გათვალისწინებით მათ საჭიროებებს მოარგეს. განიხილეს კონკრეტული მაგალითები და ქეისები. 

შეხვედრები კითხვა-პასუხის რეჟიმში წარიმართა.